Aminado ang opisyal sang Negros Electric and Power Corporation (NEPC) nga madamo sang mga nagtrip-off nga kuryente bangod sa hangin nga dala sang Severe Tropical Storm Kristine.
Sa interview sang Bombo Radyo Bacolod kay Engr. Leomel Tambanillo, assistant Vice President for Planning and Business Operations sang Negros Power, aminado ang mga ini nga madamo sang area nga nagtrip-off ang kuryente humalin kahapon sang aga bangod sa mamadlos nga hangin dala sang bagyo.
Kalakip sa naapektuhan ang Bacolod-Bata, Burgos Substation kag Mountain View Substation kun sa diin may naguba nga insulator sa 69KV line kag nag-apekto sa pila ka mga Feeder.
May mga nagkalautod man nga primary wires, kag ila naman nga gintinguhaan nga mabalik gilayon ang power supply.
Suno kay Tambanillo, sa kaangay nga panahon, madamo sang mga sanga sang kahoy ang nagabunggo-bungo sa linya sang kuryente, kag may mga sanga nga nagaka-utod nga mahimo magtuga sang mga power interruption.
Panugyan naman sini sa mga member-consumer nga may ara sang complaint nga kun indi makasulod sa hotline, magmessage sa facebook page sang Negros Power kag idetalye ang problema.
