Nagpatigayon ang Negros Electric and Power Corporation (NEPC) sang groundbreaking para sa Underground Distribution System Project kaina sang aga sa Negros Occidental Capitol Lagoon.
Ang underground cabling ang una nga patigayonon sa bahin sang Lacson St, Bacolod City sa kalabaon nga isa ka kilometro.
Ini ang may budget nga P79 million kag tinutuyo nga maumpisahan sa Enero kag matapos sa Oktubre masunod nga tuig.
Suno kay NEPC President Roel Castro, ang underground cabling ang isa sa ila proyekto nga gincommit agud nga mangin lovable kag livable ang ciudad sang Bacolod.
Suno diri, amat-amat lamang ang ila trabaho sa pagdevelop sa ciudad apang ila ginatinguhaan nga mahatag ang kunmpleto kag insakto nga serbisyo sa mga konsumedor.
Bangod sini nangayo sang pagpaintindi ang NEPC samtang padayon ang ila nga pagtuman sang ila promisa.
Dugang pa ni Castro, kun kaisa malawig ang oras sang duty sang mga personnel agud lamang mapabalik ang kuryente kag mahatagan sang husto nga serbisyo ang mga pumuluyo.
Ang underground project ang pinakauna nga undergound cabling nga patigayonon sa ciudad sang Bacolod kag probinsya sang Negros Occidental.
