Ginpahayag sang Asst. Vice President for Planning and Business Operations sang Negros Electric and Power Corporation (NEPC) nga halos ang mga ciudad kag munisipalidad ang apektado sang power outage.
Sa interview sang Bombo Radyo kay Engr. Leomel Tambanillo, madamo sang mga lugar sa ciudad kag banwa sa Negros Occidental ang padayon nga nagaekspersyensya sang brownout.
Suno kay Tambanillo, 43 ka barangay ang apektado sang brown-out; Talisay City may 15; Silay City 13; Bago City 23; Murcia 19 kag Don Salvador pito ka Barangay.
Sunod diri,wala sang feeder wide nga naapektuhan sang brownout.
Dugang pa sini, indi man malikawan ang brownout bangud sa malain nga tiyempo kun sa diin nagasige ang pag-ulan kag may yara pa sang mabaskog nga hangin nga rason sang pagkatumba sang puno nga isa man sa ginatunaan sang brown-out.
Magluwas diri, may yara man sang mga linya sang kuryente nga nagakabugto ang alambre.
Ginpahayag man sini nga ang mga linemen ang nagadouble time man sa pagkay-o sang mga linya sang kuryente nga may problema agud mapasiga na ini.
Ginpaathag man sini nga may ticket number nga kinahanglan ang mga linemen antes magkay-o agud masiguro nga recorded ang tanan nga complaints.
Bangud indi tanan nga tawag sa hotline ang masabat sang representatives, mahimo ang mga consumers nga magmensahe sa facebook page sang Negros kag ibutang ang detalye sang ila complaints agud nga marespondehan.
Sa pihak nga bahin, nagapabilin sa ospital sa ciudad sang Bacolod ang 34 anyos nga lineman sang Negros Power matapos nga madagdag samtang nagapatigayon sang vegetation clearing sa Circumferential Road, Brgy Villamonte, Bacolod City, sang Domingo, kapin alas- 3:00 sang hapon.
Nahibaluan nga ginkilala ang lineman nga si Jessie James Torremocha nga residente sang ciudad sang Davao kag nagatrabaho diri sa Bacolod.
Napahibalo naman sang NEPC ang pamilya ni Torremocha kag naka-abot na ang asawa sini diri sa ciudad.
