Ginaulan sang pagpanginbulahan ang Negros Shiseikan Kendo Club bangud sa ila nga outstanding performance sa Ho Chi Minh Open Kendo Tournament 2026 in Binh Duong, Vietnam.
Sa amo nga torneyo, ang Negros Shiseikan Kendo Club ang gindeklarar nga overall champion kun sa diin gindala nila pauli ang siyam ka gold medals, isa ka bronze medal, isa ka fighting spirit award kag championship sa pito nagikan sa siyam ka category.
Gintiglawas sang team ang Negros Occidental kag ang Pilipinas sa international stage kag nakontra nila ang mga participants nagikan sa Japan, USA, Korea, China, Vietnam kag iban pa nga pungsod.
Sa interview sang Bombo Radyo sa gold medalist nga si Jackie Louise Magpusao, naghanas sila sang maayo antes ang torneyo kun sa diin lima ka beses ang 3-4 hour training sa sulod sang isa ka semana.
Challenging suno sa iya bangud kinahanglan nila ibalance ang klase kag training kag kinahanglan nila nga magfocus.
Suno sa Grade 10 student, nagaplano sila nga magpasakop sa mga torneyo sa iban pa gid nga pungsod kag makakuha sang medalya.
Suno naman sa isa pa gid ka gold medalist nga si Lolana Chen Marinduque, rookie ukon bag-uhanon siya sa sahi sang sport gani aminado ini nga madamo pa siya sang maagyan.
Suno kay Marinduque, luyag nila nga mag-expand sang participation sa mga torneyo sa iban nga pungsod kag mag-extend sang ila nga club sa iban man nga luyag mangin miyembro.
Suno sa Grade 11 student, indi lang medalya ang ila ginalagas sa pag-intra sa international tournament kundi ang pagpakita sang pagpalangga sa kendo kag ang fighting spirit.
Nagpasalamat naman ini sa iya mga ginikanan kag sa tanan nga nagsuporta sa ila.
