Gin-athag sang director sang Philippine Institute of Volcanology and Seismology nga indi lang ang Metro Manila ang may pamahog sang “Big One” bangud ang pamahog ang matabo man sa iban nga bahin sang pungsod kalakip na sa Negros Island.
Suno kay Philippine Institute of Volcanology and Seismology Director Teresito Bacolcol ang Negros Trench ang may ikasarang sa pag-generate sang magnitude 8.2 nga linog.
Ang Negros Trench ang nahamtang sa naaminhan nasidlangan sang Sulu Trench kag nabagatnan sang Negros Island Region kag may yara sang 400 kilometros ang kalabaon.
Yara ini sa sulod sang Sundae Plate sa southwestern Pacific Ocean.
Suno kay Bacolcol nga ang magnitude 8.2 nga linog ang magatay-og sa bug-os nga Negros Island.
Ang nasambit nga linog ang mahimo man makatrigger sang tsunami sa western coastlines sang Negros kag Panay, kag sarang nga makalab-ot sa Palawan kag Zamboanga.
Ang mga senyales sang magaluntad nga tsunami ang ginalakipan sang mabaskog nga pagtay-og nga daw haluson na makatindog ang isa ka tawo, hinali nga paghunas sang tubig-dagat kag mabaskog nga pagngurob nagikan sa dagat.
Suno kay Bacolcol kun makita kag mabatian ang nasambit nga mga indicators gilayon na nga mag-evacuate.
Pahanumdom ni Bacolcol nga likawan ang pagkuha sang video ukon magfacebook live sa tion sang emerhensya agud nga malikawan ang casualties.
Ginalantaw nga pinakadako nga maapektohan ang ciudad sang Bacolod kun magluntad ang magnitude 8.2 nga linog nga sarang magenerate sang Negros trench.
Sa intervew sang Bombo Radyo Bacolod kay Dr Ana Maria Pornan, pinuno sang Bacolod City Bacolod City Disaster Risk Reduction Management Office (DRRMO), may apat ka major fault line sa Negros Island kag ini amo ang East Negros Fault, Central Negros Fault, West Negros Fault, kag Southern Negros Fault nga lunsay ginabantayan.
Suno diri, ginamonitor ang San Carlos, Calatrava-Toboso, Bindoy-Guihulngan kag faults ilabi na nga sunod-sunod ang pagluntad sang linog nga bisan ang ciudad sang Silay kag banwa sang Murcia nakabatyag.
Suno kay Pornan, mahinay lang man ang mga nagaluntad nga linog apang ginabantayan ini bangod malapit lang ini tanan sa ciudad sang Bacolod.
Pahayag ni Pornan, kun magluntad gid man ang makusog nga linog, sa bug-os nga Negros Island ginalantaw nga 20 out of 40 ang casualty nga matabo sa Bacolod City bangod madamo sang dalagko nga building sa ciudad kag madamo sang tawo magluwas sa pumuluyo, iban nagatrabaho pa diri.
Nagpasalig naman ini nga preparado ang City Engineers Office, Department of Public Works and Highways, rescue groups kag DRRMO, apang nagapangabay ini nga kun tani indi lang matabo ang dako nga linog sa Negros.
