Nagpanawagan sa mga pumuluyo ang Negros West Philippine Sea Advocacy group nga magtindog kag makig-isa sa mabaskog nga pagpamatok sa harassment sang China Coast Guard.
Sa interview sang Bombo Radyo Bacolod kay Negros West Philippine Sea Advocacy lead convenor Wennie Sancho, gintukod nila ang grupo bangod wala pagid sila sang nakita nga grupo nga hugot kag mabaskog ang panindugan nga kondenahon ang China.
Ginlaragway sini ang harrassment sang China Coast Guard nga kaangay sang pirata.
Suno diri makabig nga kahuy-anan para sa pungsod ang insidente sang nakaligad nga semana kun sa diin ang armed forces sang Pilipinas ang indi makabalos sa kahangawa nga makatrigger sang gyera.
Ini ang insulto man sa National Pride sang mga Pilipino, gani panawagan sini sa mga pumuluyo nga kinahanglan na nga mapakita ang nationalismo.
Panindugan sini nga sila ang wala nagapanawagan sang gyera, sa baylo luyag lamang sang mga ini nga mabatian sang China ang kaakig kag kainit sang mga Pilipino.
Suhestyon sini nga pun-an ang mga baybayon kun sa diin magatindog ang tanan nga nagapamatok sa tikang sang China, nga magaserbe man nga tingog sa pagpanindugan sa sovereign kag democratic rights sang Pilipinas.
Suno diri, ginataha man sini si Executive Secretary Lucas Bersamin, apang indi ini kumpormi sa deklarasyon nga indi pa armed conflict ang pagpangharras sang mga intsik.
Sa pagbitbit sang China Coast Guard sang mga wasay sa komprontasyon sa mga Pilipino, makita na nga sila ang may katuyuan gid nga manakit kag ginalantaw nga bisan lapakon nila ang mga Pilipino ang mga ini ang mahipos lamang.
