Kasunod sang lapnagon nga brown-out, gilayon man nga nagpagwa sang statement ang Negros Electric and Power Corporation.
Suno diri, nagcollapse ang 13 anyos na nga Power Transformer sang Alijis Substation.
Yari ang kabug-usan nga statement sang NEPC
“13 anyos nga 30/37MVA power transformer sang Alijis substation, naguba na
Bangud sa katigulangon kag mga insidente sang overloading, bumigay ang 13 anyos nga 30/37 MegaVolt Ampheres (MVA) sang Alijis Substation, pasado alas Otso kagabi kabangdanan nga nadulaan sang kuryente ang 7 tanan ka mga feeders nga konektado dire.
Suno kay Negros Power Chief Operations Officer Engr. Bailey Del Castillo, nagtagas ang langis sang nasambit nga transformer kag sa pagpangusisa, may guba sa sulod sini kag indi madali-dali sang kay-o.
Ang desisyon sang Negros Power, bayluhan na lang ini sang bag-o kag paga-abuton sang halos 2 ka semana antes ini maitakod.
Gani ginpakamaayo nila nga i-angot na lang anay ang mga feeder lines sang Alijis Substation sa mga malapit nga feeders sang iban nga substations agud didto anay makakuha sang supply nga magaabot sa halos 32 Megawatts.
Suno kay Engr. Del Castillo, ang latest update sa Alijis feeders as of 7am:
AF1: Natagaan na sang supply sang kuryente.
AF2: Padayon ang reconfiguration sang feeder connection kag kinahanglan pa sang 2 tubtob 3 ka oras.
AF3: abuton pa sang halos 24 oras bangud kinahanglan nila nga maglatag sang bag-o nga linya nga igakonekta sa pinakamalapit nga feeder sang Murcia substation.
AF4: Padayon ang reconfiguration sang feeder connection kag kinahanglan pa sang 2 tubtob 3 ka oras.
F5: Ang dako nga load nga konsyumer ginarequest nga mag-gamit lang anay sang ila generators.
AF6 Padayon ang reconfiguration sang feeder connection kag kinahanglan pa sang 2 tubtob 3 ka oras.
AF7: Ang dako nga load nga konsyumer ginarequest nga mag-gamit lang anay sang ila generators.
Maid-id man nga pagabantayan sang Negros Power ang mga nagsalo nga feeders agud nga indi maoverload kag magapatigayon sang Manual Load Dropping kun kinahanglanon agud malikawan ang mas malawig nga power interruption.
Nagpangayo sang pasaylo ang Negros Power sa mga apektado nga konsyumedor kag ginaobra na ang tanan nga paagi agud maibalik sa normal ang tanan nga supply kag liwat nga mapaganan ang Alijis substation.”
