Padayon ang pagpeparar sang Negros Electric and Power Corporation para sa estable nga kuryente kag wala sang power interruption nga magluntad sa eleksyon.
Sa interview sang Bombo Radyo Bacolod kay Engr. Leomel Tambanillo, assistant Vice President for Planning and Business Operation sang NEPC, masobra duha ka bulan ang ila preparasyon sa pagkoordinar sa Commission on Election kag Local Government Unit sa ciudad sang Silay, Talisay, Bacolod, Bago, Murcia kag Salvador Benedicto.
Suno diri, padayon ang pagtsekyar sa 173 ka mga voting centers kun sa diin ginalauman nga matapos ang inspection sa ikaduha nga semana sang bulan sang Abril.
Ila sa karun gina-evaluate ang mga transformers nga dapat wala sang overload kag wala sang loose connection sa linya sang kuryente, kasubong man sa pag-clear sa vegetation sa primary lines.
Suno kay Tambanillo, kalabanan sa ila naobserbahan sa voting centers amo ang improper connections kag linya nga may vegetation.
Pahayag sini, may yara man sang idesignar nga mga crew para magmonitor kag magpatrol sa voting centers agud pananglitan nga may matabo, madasig ang pagresponde.
Nagpasalig naman ini nga ila ginahimo ang tanan agud mangin estable kag wala sang power interruption nga magluntad antes ukon sa adlaw mismo sang election.
