Naka-detain sa gihapon sa Pasay City ang aktres nga si Neri Naig-Miranda kun sa diin nagdangat sa kapin P2 million ang pyansa sini.
Ginkumpirmar sang Philippine National Police (PNP) Southern Police District (SPD) ang pag-aresto sa 41 anyos nga aktres nga kilala bilang alyas ‘Erin’ sa isa ka mall sa Pasay City sang Nobyembre 23.
Ginserbe ang arrest warrant kay Neri bangod sa 14 counts violation of Securities Regulation Code.
Ang pyansa ang yara sa P126,000 sa kada isa ka count nga may kabug-usan nga balor nga kapin sa P1.7 million.
Gindepensahan naman ni Chito Miranda- ang Parokya ni Edgar vocalist, ang asawa sini nga si Neri.
Santo sa post ni Chito sa social media, wala sang may gin-into ang iya asawa kag wala ini nagkuha ukon nangayo man sang kwarta kay bisan sin-o.
Dugang pa sini, wala naga-untat sa pagbulig ang iya asawa nga kun kaisa gina-abusar pa ang iya pagkamabinuligon.
Pahayag ni Chito, naaresto si Neri nga wala sang notice sang criminal complaint batok sa iya kag wala man ini nakabaton sang sulat gikan sa prosecutor ukon subpoena bisan nga mahapos lang sila nga lab-uton sa ila residence sa Alfonso, Cavite.
