Nagapabilin nga buhi ang paglaom ni Nesthy Petecio nga makuha ang gold medal sa 2024 Paris Olympics matapos ang malutos si Jaismine Lamboria sang India via unanimous decision sa round of 32 sa women’s 57kg class sa North Paris Arena kaina pasado alas 12:00 sang kaagahon.
Si Petecio ang ikaduha nga miyembro sang Philippine boxing team nga nag-advance sa round of 16 matapos kay Aira Villegas.
Si Petecio, nga isa ka silver medalist sa Tokyo Games sang 2021, ang nagdaoag lunsay sa lima ka mga scorecards sang judges bangud sa nangin performance sini batok kay Lamboria, 22-anyos, nga mas manghod sa iya sang napulo ka tuig.
Apisar nga makabig nga height advantage ang kataason ni Lamboria nga 5-foot-9, nangin mahinay naman ini kun ikumparar sa 32-anyos nga Filipina.
Si Petecio ang nagabuya sang mas matinlo kag mas mabug-at nga mga sumbag kag makapila ka beses man nga nakalikaw sa mga punches ni Lamboria.
Sa interview sang Bombo Radyo kay Coach Reynado Galido, head coach sang Philippine Women’s Boxing Team, nakasparring na nila si Lamboria sa training camp sa Germany kag ila na natun-an ang mga technique kag style sini ilabi na nga siya ang mas mataas kay Petecio.
Ang mangin masunod nga kasumpong sang Pinay boxer sa Agosto 2 amu si Amina Zidani sang France nga suno kay Galido, ila naman nakasparring sang makapila ka beses sa Bulgaria kag Thailand apang bangud nga homecrowd ini kag madamo sang supporters, indi sila magpabaya sa kada round kag preparahan gid sang maayo.
Madamo man nga mga Filipino ang nagsuporta kay Petecio sa iya hampang kaina.
Suno diri, lain ang awra ni Petecio sa karun kag inspired ini bangud siya ang pursigido nga makuha ang bulawan.
