Ginakalipay sang Negros Occidental Police Provincial Office nga pirmado na bilang layi ang hagna nga magapanubo sang height requirement sa mga magasulod sa Philippine National Police, Bureau of Fire Protection, Bureau of Jail Management and Penology kag Bureau of Corrections.
Suno kay P/Lt. Abegael Donasco, deputy spokesperson sang Negros Occidental Police Provincial Office (NOCPPO) sa karun ginapahanugutan na ang height nga 5-feet-2 para sa lalaki samtang 5 feet naman sa mga babayi.
Paathag ni Donasco nga nauna na sa amo nga standard ang Philippine Army.
Ginapakamaayo naman sini nga napirmahan na ang hagna nga ginfile ni Senator Ronald “Bato” Delarosa kun sa diin, tinutuyo sini nga mangin kaangay ang height requirements sang kapulisan sa height requirements sang militar.
Nagapati si Donasco nga wala naman naga-upang sa pagtuman sang duties kag responsibilities sang mga kapulisan ang height.
Dugang pa sini nga indi man-apektado sang kataasun ang performance sang isa ka police personnel.
Paathag sini nga sa aplikasyon palang, kalakip na sa application system sang PNP ang QR Code kun sa diin nakabutang ang orihinal nga height sang isa ka indibidwal.
Madumduman nga sadto mas mataas ang height requirements sang mga kapulisan kun sa diin 5-feet-5 ang required para sa mga lalaki samtang 5-feet-2 naman ang minimum height requirements sang mga babayi.
Paathag ni Donasco nga wala ginalantaw kun mataas ukon manubo, bangod ang basehan amo ang ikasarang nga tumanon ang obligasyon.
Ginpakigbahin man sini nga anay kadete kag alumnus man sang Philippine Military Academy (PMA) si Senator Dela Rosa, gani ini man ang nagpropose nga iparehas ang height standard sang duha ka armed forces bangod wala man ini mangin negatibo nga epekto sa performance sang mga personnel.
