Ginkumpirmar sang hepe sang Toboso Municipal Police Station nga gin-ako na sang New Peoples Army paagi sa gin-issue nga statement nga sila ang nagpatay sa negosyante sa Purok Kawayan, Barangay Bug-ang, Toboso, Negros Occidental, sang Lunes.
Sa interview sang Bombo Radyo kay Police Major Jun Ray Batadlan, hepe sang Toboso Municipal Police Station, nagpagwa na ang New Peoples Army nga sila ang nagpatay sa negosyante nga si Juvie Sarona, 42 anyos kag residente sang nasambit nga lugar.
Madumduman nga ginpaarakan sang tiro sang armado nga grupo si Sarona kun sa diin ini ang nakaangkon sang igo sa ulo, dughan kag butkon nga gintunaan sang gilayon nga kamatayon.
Suno kay Batadlan, ginalantaw nga kapin 15 ka mga suspek ang imbulbado sa pagpatay sa biktima.
Suno sa hepe, madamo sang rason nga ginbutang ang NPA sa ginpagwa nga statement agud nga patyon ang biktima.
Sa karun, may yara na ang Toboso Municipal Police Station sang mga identified suspeks kag ginapreparar na sang mga ini ang dokyumento agud nga mainquest na kag mapasakaan sang kaso.
