Nagpasalig ang National Food Authority – Negros Occidental nga bastante kag maayo ang quality sang bugas nga ibaligya sa balor nga P20 kada kilo sa probinsya.
Suno kay National Food Authority – Negros Occidental Branch Manager Benilda Fidel, bastante ang supply sang bugas sa probinsya kun ipatuman na ang pagbaligya sang P20 per kilo.
Suno diri, ang bugas nga ila ipaggwa ang ginbakal sa mga local farmers kaangay sa banwa sang Valladolid kag Isabela kag ciudad sang Bago kag Sipalay.
Ginpa-athag sini nga ang humay nga ginabaligya sa ila sang farmers ila lang ginabaton apisar sa kun ano man ini nga variety.
Paglab-ot sa pagpagaling nagasamo ang matig-a kag mahumok nga variety sang humay amo nga madamo sang nagahambal nga indi maayo manami ang bugas sang NFA.
Dugang pa sini nga ang commercial rice may yara sang gina-maintain nga variety kag selected ang quality apang sa NFA ginabakal lang nila ang humay halin sa local farmers basta sulod sa standard nga ginarequire nila.
Gin-athag man ni Fidel nga wala sang bulong ang bugas nga halin sa NFA bangod sila mismo nagaconsume man sang amo nga produkto kag suno pa diri indi pagkalipatan nga halin sa local farmers sang probinsya ang ginabakal nga humay.
Samtang, ginsuhestyon naman ni Comelec Chairman George Erwin Garcia nga taposon na lang ang eleksyon antes ang pagbaligya sang P20 nga kilo sang bugas agud indi na magamit pa sa pamulitika.
