BACOLOD CITY — Ginbansagan na sang mga pumuluyo sa Sitio Pulo, Barangay Latasan, banwa sang EB Magalona nga “killer tree” ang mga puno sang bungalon nga nagatubo malapit sa higad sang baybay bangud pila na ka mga residente ang nagbitay sang ila kaugalingon diri.
Sa kabug-usan, tatlo na ang nagkalamatay matapos maghikog sa Barangay Latasan samtang tatlo man ang nag-attempt nga magsuicide.
Duha sa mga nagkalamatay ang nasapwan na lamang nga nagabitay sa puno sang bungalon apang sa magkatuhay man nga mga petsa.
Sa pagpangusisa sang Bombo Radyo, nagbitay sa bungalon si Cristituto Mendoza Sr. sa ulihi nga semana sang Hunyo kag sang Hulyo 8, nagpanginmatay man sa lain nga puno si Romeo Ruben.
Suno kay Barangay Kagawad Mary Chris Mahinay, mahimo nga natublag si Ruben bangud napatay niya ang iya stepfather sang Hulyo 7.
Si Mendoza naman ang naglisensiya pa sa mga pulis nga ini ang magahikog paagi sa pagpabunggo sa bus apang nasapwan ini nga nagabitay sa bungalon.
Natingala na ang mga residente bangud magluwas sa ila, nagpanginmatay man si Manolo Santibañes Jr. sa adlaw mismo sang kaadlawan sang iya amay sang Disyembre tuig 2017.
Samtang Hulyo 2 subong nga tuig, nagtuyo man ang amay sini nga si Manolo Santibañes Sr. nga utason ang iya kabuhi bangud ginapahayag may nagahutik sa iya nga mag-apas sa iya junior apang ini ang natabangan.
Suno kay Mahinay, sang Sabado lang ginpablessingan ang puno sang bungalon apang may naghikog naman diri sang Domingo.
Bangud sini, plano nila nga pablessingan ini liwat kag pangamuyuan.
