Ginklaro sang National Grid Corporation of the Philippines (NGCP) nga indi lamang sa transmission ang problema sang power outages nga nagakaeksperyesnyahan sa Visayas.
Sa ginpatigayon nga Joint Congressional Public Hearing kahapon sa isa ka hotel sa Lacson St, Bacolod City, gin-ako ni Department of Energy Secretary Sharon Garin nga kulang ang baseload generation sang Visayas samtang dako ang demand sa kuryente.
Bangud sini, na-eksperyenyahan ang rotational brown-out bangud sa kulang nga supply sang kuryente.
Suno kay NGCP Spokesperon Atty Cynthia Alabanza, ginatinguhan nila ang pagtukod sang mga transmission line apang suno diri, indi sa gihapon ini epektibo kun kulang ang supply ang kuryente.
Ginklaro man sini nga ang NGCP ang wala ginatugutan sa layi nga makatukod sang kaugalingon nga power plant para sa ancilliary services.
Suno diri, sila ang nagabakal lamang sa mga planta nga existing sa transmission system.
Sa pihak sini, ginpahayag ni Alabanza nga nangin maayu ang pagtalakay sa hearing bangud suno sa iya, nakita kun diin ang direksyon agud mas mangin estable kag masaligan ang supply sang kuryente.
Pahayag sini nga may mga energy storage facilities na nga nakonrata ang NGCP agud maghatag sang mga ancilliary services.
Ang kontrata ang ipasaka nalang sa Energy Regulatory Commission (ERC) para sa approval agud makita kun insakto ang presyo kag maproteksyunan ang interest sang mga konsumidor.
Ginpakamaayo man sini ang nakasugtan sang DOE nga igadeploy nga solar battery storage systems kag power barges nga suno sa iya makabulig gid sa transmission kag generation.
Sa pihak sini, nag-ugyon man ini nga kabahin lamang ini sa mga short term solution kag kinahangalan gid sang bastante nga supply sang kuryente nga magamit sang mga kunsomidor.
Ginpasiguro ni Alabanza nga ila ginahimo ang tanan agud masolusyonan ang power crisis sa Visayas, apang may mga pagsulundan man sila nga ginasunod.
