Ginpasalig sang National Grid Corporation of the Philippines (NGCP) Visayas nga wala sang preventive maintenance sa masunod nga semana gani wala sang power interruption sa side sang NGCP kadungan sang eleksyon sang Lunes.
Nahibaluan nga may yara sang tatlo ka players sa energy industry nga ginalakipan sang power generators ukon ang mga power plant, transmission lines nga iya sang NGCP kag ang distribution nga amo ang mga electric cooperative.
Sa interview sang Bombo Radyo kay Michelle Visera, regional corporate communications and public affairs officer sang NGCP Visayas, nakapatigayon na ang NGCP sang preventive maintenance kag naka-on hold ang para sa masunod nga semana magluwas lang kun emergency kag kinahanglan nga irepair.
Ang over-all command center sang NGCP suno kay Visera ang igaactivate na sugod Domingo tubtub Mayo 10 kun sa diin may yara sang mga personnel nga nakastandby 24/7 kag nagamonitor sa dalagan sang kuryente diri sa Negros Occidental kag Negros Oriental.
May schedule naman ang mga personnel sang NGCP agud nga sila ang makaboto samtang nakastandby ang iban nga mga crew bilang pag-exercise sang right to suffrage.
Ang Negros Occidental ang nagakuha sang power supply sa Cebu, Panay kag diri man mismo sa probinsya paagi sa mga solar power plants.
