Ginpaathag sang regional corporate communication officer sang National Grid Corporation of the Philippines (NGCP) – Visayas ang yellow alert kag red alert nga gina-anunsyar kasunod sang gaka-eksperyensyahan nga rotational brown-out.
Sa interview sang Bombo Radyo Bacolod kay Michelle Visera, ang yellow alert ang ginapagwa sang grid kun manipis ang supply sang kuryente samtang red alert naman kung kulang na.
Suno kay Visera, ang ginpagwa nila nga advisory kahapon nga yellow alert nga nag-umpisa alas 5:00 sang hapon tubtob alas 10:00 kagab-i ang malip-ot lamang bangud diutay ang demand bangud Domingo.
Ginhalimbawa naman sini sa pagdeklarar sang red alert kun hinali nga may yara sang planta nga wala nakakonekta sa grid rason nga ginkulang ang power supply.
Bangud may kulang na sang supply sang kuryente nga indi makasustiner sa mataas nga demand, ang NGCP ang nagapatuman sang manual load dropping nga rason sang nagaluntad nga rotational brown-out.
Ginpahayag man ni Visera nga kun adlaw madamo sang ginakuhaan sang supply sang kuryente ang NGCP sa Negros Island bangud madamo sang solar energy sa Negros Occidental kag nagadugang man diri ang geothermal energy sa Negros Oriental.
Dugang pa sini nga may yara pa sang biomas energy, kag ang nasambit nga supply sang kuryente ang mahimo man nga mapuslan sang iban nga lugar sa Visayas.
Suno kay Visera, kun gab-i ang supply sang kuryente nga ginagamit sa Negros Island Region ang naghalin man sa iban nga power plants sa rehiyon.
Bangud sa nagaluntad nga rotational brownout nga ginatuga sang kakulang sang power supply bangud sa pagdisconnect sang pila ka mga planta, nagpanugyan si Visera sa publiko nga magkinot sa paggamit sang kuryente.
