Ginpa-athag sang Regional Corporate Communication Officer sang National Grid Corporation of the Philippines (NGCP) – Western Visayas ang pagpagwa sang Yellow Alert Warning.
Sa interview sang Bombo Radyo Bacolod kay Michelle Visera, ang NGCP naga-transmit sang power halin sa power plants padulong sa distribution utilities ukon electric cooperatives nga amo naman madul-ong sang kuryente padulong sa mga consumers.
Suno diri, ginalantaw sang NGCP ang supply kag demand sang generators kag electric cooperatives kag amo nga nagapagwa sila sang abiso kun manipis ang supply.
Gin-athag man sini nga ang Yellow Alert wala nagakahulugan nga automatic may yara sang power interruption.
Sila nagapahibalo lang nga may yara sang oras nga manipis ang supply kag kun may planta nga mag-out may posibilidad nga may yara sang power interruption.
Dugang pa sini, wala sang control ang NGCP kun kaisa kun may yara sang maintenance ukon may deperensya sa mga planta bangod ang makontrolar lamang nila amo ang pagsiguro sang transmission asset kag naga-abiso kun may pagnubo sa supply.
Ginpasalig ni Visera nga sa karun normal ang transmission line sang National Grid Corporation of the Philippines.
