Kadungan sang selebrasyon sang Independence Day subong nga adlaw, Hunyo 12, igalubong naman ang 20 anyos nga Senior High School student nga gintiro-patay sa Granada Heights, Barangay Granada, Bacolod City sang Hunyo 2.
Sa interview sang Bombo Radyo Bacolod kay Eric Balagusa, amay ni Nicus Balagusa, may patigayunon nga service alas 9:00 ang takna subong nga aga antes nga ini idul-ong sa Greenhills Memorial Park agud ilubong.
Kagab-i nagpanawagan si Eric sa luyag magtambong sa lubong nga magkadto lamang sa Acropolis Garden sa Barangay Bata kun sa diin ini ginahaya ukon sarang man nga makaderecho sa kun diin ini ilubong.
Ginpasalamatan man sini ang tanan nga nag-upod kag nag-unong sa ila nga kalisod.
Samtang matapos ang paglubong kay Nicus, tinguhaan naman sang mga ini kag himuon ang tanan nga masarangan agud nga makuha ang hustisya para sa ila nga anak.
