Kadungan sang pagdumdom sang Ninoy Aquino Day subong nga adlaw, nagpatigayon sang malip-ot nga programa ang mga katapo sang Federation of Urban Poor Negros sa Ninoy Shrine sa dalan Araneta, Barangay Singcang Airport, syudad sang Bacolod kaina sang aga.
Gin-umpisahan ini sang opening prayer, ginsundan sang National Anthem kag ang Opening remarks.
Ginpangamuyuan man sang mga ini ang komunidad, peoples organization kag media.
Naghalad man sila sang bulak sa rebolto ni anay Senator Benigno “Ninoy” Aquino Jr.
Indi naman magnubo sa 50 ka mga tawo ang nagtambong sa programa kun sa diin tanan ang nakasuksok sang face mask kag nag-obserbar sang social distancing.
Nahibaluan nga opisyal nga gindeklarar ang Agosto 21 nga Ninoy Aquino Day sa virtue sang Republic Act No. 9256 nga ginpirmahan sadtong Pebrero 25, 2004.
Ini nga special nonworking holiday ang may tinutuyo nga handurawon ang death anniversary ni anay Senator Benigno “Ninoy” Aquino Jr. nga isa sa nangin kritiko sang Marcos dictatorship.
Siya man ang labing una nga nadakpan matapos ang abolition sang Kongreso kag deklarasyon sang martial law sang tuig 1972.
Siya ang ginpriso sang pito ka tuig antes ginpasugtan nga makapabulong sa United States bangud sa heart condition.
Matapos ang tatlo ka tuig nga napahilayo sa iya pamilya, nagbalik ini sa Manila sang Agosto 21, 1983, apang gintiro ini sa Manila International Airport.
Si Benigno “Ninoy” Aquino ang ginbun-ag sadtong Nobyembre 27, 1932.
Siya ang nagserbe nga senador sang Pilipinas kag gobernador sang Tarlac.
