Ginpasalig ni No. 1 Kagawad Cecilia Chavez sang Barangay 13, Bacolod City nga ipadayun nila ang mga nasuguran nga proyekto kag mga programa ni Punong Barangay Tanya Familiaran.
Ini matapos nga nagfile sang resignation si Kap Tanya, ang umagad ni outgoing Vice Mayor El Cid Familiaran.
Una na nga ginkumpirmar ni Department of the Interior and Local Government – Bacolod City Director Christian Nagaynay, nga nabatun nila ang resignation Hunyo 20, apang sa petsa sang sulat, ang resignation ang epektibo Hunyo 9.
Sa idalum sang rules of succession, ang pinakamataas nga opisyal sa Barangay council amo ang magatal-os sa pwesto nga amo si Chavez.
Sa interview sang Bombo Radyo Bacolod kay Chavez, 65 anyos, last term na sini bilang Barangay Kagawad kag kuntani maga-untat na ini sa politika.
Apang plano sini nga magbulig gihapon bangod 23 ka tuig man ini nga pabalik-balik bilang Kagawad.
Suno kay Chavez, wala gid ini sang handom nga mangin Punong Barangay.
Pahayag sini nga sang Mayo 12, adlaw sang eleksyon pa sila ulihi nga nakasugilanon ni Kap Tanya kag ini ang wala na nakapakita sa mga Barangay session.
Nakibot na lamang sila sang ginpatawag sang Barangay Secretary kag Barangay Treasurer agud ipahibalo nga nagfile na sang resignation ang ila Punong Barangay.
Suno diri, maayo man nga sahi sang Punong Barangay si Familiaran kag wala gid sila sang problema sa iya.
Pasalig sini nga ila ipadayun ano man ang mga programa kag proyekto nga na-umpisahan ni Kap Tanya.
Aminado ini nga wala gid nagashare sang problema si Kap Tanya gani wala sila nakahibalo kun ano ang iya rasun sa pagresign.
Apang hugot ang pagpati ni Chavez nga ini ang wala sang kaangtanan sa pagtakop sang termino ni Vice Mayor El Cid.
