Patay ang Number 1 Most Wanted sang Bacolod Police Station 4 sang naluthangan sang pulis matapos ginserbehan sang Warrant of Arrest sa Brgy. Villamonte ciudad sang Bacolod kaina sang hapon.
Ini ang ginkilala kay Jibbert Villanueva, 24-anyos sang Purok Lubi, Brgy. 3, Bacolod City.
Si Villanueva ang naluthangan ni PO2 Vicente Pabuaya sang Warrant and Subpoena Section sang Police Station 4.
Suno sa hepe sang nasambit nga police station nga si Police Chief Inspector Ritchee Gohee, si Villanueva ang may warrant of arrest sa kaso nga robbery.
Las 2:45 kaina sang hapon sang naagyan ni PO2 Pabuaya si Villanueva nga nagapungko sa isa ka waiting shed kag iya nakilala nga isa ini sa mga wanted sang Station 4 gani iya ini nga ginlagas.
Nakapalagyo man gilayon ang suspetsado gani nagtawag si Pabuaya sang iya mga kaupdanan kun sa diin gilayon man nila ini nga ginpangita tubtob nga may nagtudlo sa ila nga yara si Villanueva sa balay ni Alyas Chuckie sa Malaspina St., Brgy. Villamonte.
Sang nagsulod ang kapulisan sa balay, naglitaanay pa sila sang suspetsado tubtob nga ginpabayaw ini ni PO2 Pabuaya sang iya kamot apang gintayaan man siya sini sang armas.
Wala na ginhulat sang pulis nga unahan siya sang suspetsado gani iya ini ginluthang kun sa diin naigo ini sa dughan kag liog.//
Nagtinguha pa kuntani nga malagyo si Villanueva matapos naluthangan pinaagi sa paglumpat sa katupad nga balay samtang bibit ang iya armas.
Samtang, gina-imbestigaran man sang Station 4 ang report nga nanghold-up pa si Villanueva antes napatay.
Nahibaluan nga las-3:00 man kaina sang hapon may nagreport sa Station 4 nga gin hold-up sila sa bahin sang Bangga Patyo samtang sakay sang Shopping-La Salle nga jeep.
Nakuha sang mga suspetsado ang 183 mil pesos cash sang mga biktima.
Sang ginpalantaw sa rouges gallery ang biktima didto kag positibo sini nga ginkilala ang suspetsado.
Nahibaluan nga si Villanueva ang Number 3 Most Wanted man sang Bacolod Police Station 2 kag siya ang ginatudlo suspetsado sa pagpangawat sang madamo nga mga motorsiklo.
