Nagdamgo pa kaina sang kaagahon ang Number 2 sa Physician Licensure Examination 2020 nga wala ini nakapasar sa pasinawan gani wala siya gilayon nagpati nga nakasulod siya sa Top 10.
Sa interview sang Bombo Radyo kay Dr. Patrick Joseph Mabugat sang Brgy. Alijis, Bacolod City, bangud sa malain nga damgo, namurag-muragan ini sang ginpahibalo siya nga nag-Number 2 siya sa 3,538 nga nakapasar sa lincensaure exam.
Ginpakigbahin ni Mabugat nga wala siya naglaom nga makasulod sa Top 10 bangud handom lamang sini nga makapasar sa pasinawan.
Ang 26-anyos nga graduate sang University of Saint La Salle ang topnotcher man sa Medical Technologist Licensure Examination sadtong 2014.
Suno diri, ginahalad niya sa iya pamilya ang kadalag-an bangud sa suporta sa iya pagtuon kasubong man sa iya fiance nga si Dr. Dyan Dimalaluan nga dungan niya man nga nakapasar sa licensure exam.
Natalana kuntani ang ila kasal sang bulan sang Setyembre apang napostpone ini bangud sa COVID pandemic.
Suno diri, hindi mahapos ang ila nga pagreview para sa board exam bangud sa pandemya.
Suno kay Dr. Mabugat, magapabilin siya diri sa Bacolod kag diri man siya magaserbisyo bilang isa ka doktor.
Si Mabugat ang subang sa apat nga mag-ululutod nga lunsay mga lalaki nanday PNP-Internal Affairs Service chief of staff Police Col. Calixto Mabugat samtang ang iya iloy nga si Arlene ang nagatrabaho sa Philippine Amusement and Gaming Corporation diri sa syudad sang Bacolod.
