Ginkalipay sang driver sang ambulance sang Barangay Tangub matapos nga gindeklarar na sang Commission on Election nga siya ang nagdaog bilang Barangay Kagawad sang Barangay and SK Election sang 2023.
Ang proklamasyon sa pagpungko ni Kagawad Erwin Montaño ang ginpatigayon s Rodolfo Meder Sr. Elementary School kaina sang aga.
Sa interview sang Bombo Radyo Bacolod kay Montaño, tatlo sila nga parehas ang apelyido nga nagpapili sa pagka-Kagawad gani nagtalang-talang ang iban nga boto.
Suno diri, sa unofficial record sang mga watchers sini, siya ang nakatipon sang 3,086 votes apang sa ginpagwa nga official result ini ang may-ara lamang sang kapin 2,400 ka boto.
Bangod sini siya ang naglabog sa rank-10 imbes nga kuntani Number 4 Kagawad.
Suno diri, isa lamang ka presinto ang nagkaproblema kun sa diin ang dapat 970 votes ang nahimo nga 344.
Wala naman ini nagfile sang case bangod suno kay anay Bacolod City Election Officer Atty Katrina Trinio Caña, ang board of canvasser na la,ang ang magafile sang petition to correct manifest error.
Bangod sini, ang dapat No. 8 Kagawad nga si Hannah Sanchez amo ang nagpungko bilang No. 7 Kagawad.
Apisar nga madugay naggwa ang resulta, ginapasalamatan ni Montaño nga siya ang makapungko sa pwesto, bilang opisyal nga ginpili sang mga residente.
Wala naman ini naglagas sa wala nabatun nga sweldo, sa baylo tungaan na lamang nila ni Sanchez ang sweldo subong nga Pebrero, bangod ini ang nagtambong sa una nga Barangay session.
Handa man ini nga magbatun sang kun ano man nga komitiba nga ihatag sa iya, kag nagpasalig nga ihatag ang iya masarangan.
Ginpasalamatan man ni Montaño ang mga nagsuporta sa iya sang tion nga stressed sa natabo, partikular na si Punong Barangay Noli Villarosa.
