Dakop ang ginakabig nga No. 8 Most Wanted Person Municipal Level sa kaso nga pagpatay sa Sitio Galo, Brgy 5 sa banwa sang Isabela sang Agosto 26 alas 4:00 sang hapon.
Ang wanted person ang ginkilala nga si Joevel Pactoran, 42 anyos, may pamilya kag mga kabataan, mamumugon kag residente sang Sitio Mantabon, Barangay Camangcamang, Isabela, Negros Occidental.
Sa interview sang Bombo Radyo Bacolod kay Police Major Ellendie Rebusquillo, hepe sang Isabela Municipal Police Station, madugay na nila ginamonitor ang suspect tubtob nga natigayon nga madakpan.
Sa imbestigasyon sang kapulisan, ang biktima kag suspetsado ang wala naghangpanay tubtob nga ginbuno ni Pactoran ang biktima.
Dugang pa ni Rebusquillo nga wala naman sang iban pa nga kaso nga ginapatubang ang suspect.
Ang warrant of arrest ang gindagdag ni Hon. Cyclamen Jison Fernandez, presiding judge sang Regional Trial Court sixth judicial region, Branch 63 sa ciudad sang La carlota sang August 16 kag ini ang wala sang ginarekomendar nga pyansa.
