Magapatuman ang City Government sang Bacolod sang “no appointment, no work” policy para sa job order (JO) casuals humalin sa Enero 1, 2025.
Ini ang kasunod sang direktiba ni Bacolod City Mayor Alfredo Benitez kun sa diin nagpagwa sang Memorandum No. 271 sang December 18, 2024.
Ang memorandum ang nagamando sa tanan nga department heads nga ang JO casuals nga wala sang signed appointment epektibo Enero 1, 2025 ang ginadumilian nga magtrabaho sa ila mga opisina.
Gin-emphasize man sang alkalde nga ang mga JO casuals nga ang pangalan ang yara sa final lists nga ginhatag sang City Mayor’s Office kag ginpirmahan sang Secretary to the Mayor, ang pahanugutan nga magreport sa nasambit nga petsa.
Sa interview kay Bacolod City Administrator Lucille Gelvolea, ginahulat pa nila ang sectoral offices nga makapasa sang ila nga report nga nagalakip sang listahan sang mga JO casuals nga eligible sa pagtrabaho sa 2025.
Suno kay Gelvolea, nagpatigayon man ang opisina sini sang assessment sang mga JO casuals kag nagpasa man sang ila nga rekomendasyon.
Ginpahayag man nga ginalikawan lang nila nga matabo liwat nga wala naswelduhan matapos nga magtrabaho bangud wala sang contrata.
Sa karun ang ciudad sang Bacolod ang may yara sang kabug-usan nga 4,800 JO casuals kalakip na ang naassigned sa public schools.
Samtang, ang mga ini ang nakabaton naman sang gratuity pay.
