Nagsugod na subong nga adlaw ang Land Transportation Office sa pagpatuman sang mandu sang Department of Transportation nga mandatory na ang pagsuksok sang face shield kun magsakay sa public transportation.
Sa interview sang Bombo Radyo Bacolod kay LTO Himamaylan head Renato Novero, kahapon sila nakabaton sang Implementing Rules and Regulations sang Memorandum Circular No. 2020-031 sang Department of Transportation (DOTr) nga nagamando sang mandatory nga pagsuksok sang mga pasahero kalakip na ang driver sang face shield nga nagatabon sa bilog nga nawong.
Suno diri, dapat siguruhon sang mga driver nga nagasuksok sang face shield nga nagatabon sa bilog nga nawong ang mga pasahero bangud sa idalom sang Joint Administration Order (JAO) sang DOTr kag LTO, ang madakpan ang multahan sang P2000 sa first offense, P3000 sa second offense kag P10,000 naman sa third offense kag revocation sang driver’s license bangud sa reckless driving.
Ginpahayag man sini nga sa tion nga madakpan ang isa ka driver sang sunod-sunod tubtob nga narevoke na ang driver’s license, indi na ini mahimo makakuha sang lisensya liwat.
Suno kay Novero, ang magapatuman sang mando amo ang mga nagafield nga katapo sang LTO, Highway Patrol Group kag mga police nga gindeputize sang LTO nga magpatuman sang mando sang DOTr.
Ang madakpan nga wala nagasunod ang mga pasahero ang isyuhan sang Temporary Operator’s Permit (TOP).
Ginpanugyan man sini nga ipaiway na lamang sang mga driver ang pagpasakay sa mga pasahero nga wala nagasuksok sang face shield agud indi mamultahan.
Samtang mahatag man sila sang konsiderasyon sa una nga adlaw sang pagpatuman sang mandu paagi sa paghatag lang sang warning kag pagpatigayon sang information dissemination.
Nagpanawagan man ini nga magsunod sa patakaran kag ugalion nga tinluan ang mga face shield agud indi magburon.
Samtang aminado ang isa ka driver sang Public Utility Jeepney ( PUJ) sa ciudad sang Bacolod nga mabudlayan sila sa ginapatuman nga mandatory nga pagsuksok sang faceshield sa mga pasahero bangud indi tanan ang makasarang magbakal bangud sa epekto sang pandemya.
Suno kay Romy Pusa nga nagabyahe sang Alangilan-Burgos nga jeep, para sa iya wala man sang problema ang pagpatuman sang mandatory nga pagsuksok sang faceshield bangud proteksyon man ini batok sa COVID-19 apang nagakabalaka ini nga sarang sila madulaan sang pasahero bangud indi tanan ang may ikasarang sa pagbakal sini.
Ginpahayag man sini nga kuntani mapanubuan ang presyo sang faceshield bangud may yara sang nagabaligya sini nagabalor sang P100 ang isa nga sang nakaligad mabakal lamang ini sa P50 kada isa.
Samtang, ginpahayag man ni Ricky Mesa, driver sang PUJ nga nagabyahe Punta Taytay Central Market, nga sundon nalang ang patakaran bangud isa ini ka tikang sang gobyerno nga ini madali malatunan sang virus nga tuga sang COVID-19.
Suno diri apisar nga masilaw kun mainitan ang faceshield kag mabudlay para sa ila nga mga driver magmaneho dugangan pa sang silaw nagikan sa windshield, magasunod sila sa patakaran.
Kinahanglan man nga pahanumduman nila ang mga pasahero sa pagsuksok sang face shield agud indi man sila mamultahan sa tion nga madakpan.
Wala man sang pasahero sang taxi nga wala nagasuksok sang faceshield.
Suno kay Arnold Villarias sang Barangay Guihularan, Silay City, maayo man ang ginapatuman nga layi angot sa pagpatuman sang mandatory nga pagsuksoksang face shield.
Sila naman mismo ang nagaremind sa mga pasahero sa pagsuksok sini bangud mahimo sila nga mamultahan kun indi sila magsunod kag nabatian man sini sa interview sang Bombo Radyo kay Renato Novero, ang pinuno sang LTO-Himamaylan City Office nga mahal ang multa sang madakpan.
