Padayon nga nagapahanumdom ang city legal officer sang Bacolod City Government sa “No permit, No rally policy”.
Sa interview sang Bombo Radyo Bacolod kay Bacolod City Legal Officer Atty. Romeo Carlos Ting Jr., ang mga wala sang permit ang indi dapat makarally kaangay lamang sang ginpatigayon nga rally-protest sang pila ka mga driver’s kag operators sang traditional jeepney sa Bata kag Magsaysay fly-over.
Suno kay Ting, nagsaylo ang mga ini matuod sa Bacolod Public Plaza apang ang problema naman wala ang mga ini nagpahibalo sa ciudad tatlo ka adlaw antes ang pagpatigayon sang aktibdad santo sa nakapasad sa layi.
Suno diri, una na siya nga nagmando nga kun indi boluntaryo nga mag-untat ang mga nagrally, idisperse ang mga ini bangud dapat nga ipatuman ang ordinansa.
Paathag sini nga mabudlay kun indi mapatuman ang ordinansa bangud kun magpinagustuhanay na man lang sa pagrally, mabudlay naman ang pagpabilin sang seguridad sang publiko.
Suno kay Ting, ginlapas sang mga nagrally nga wala sang permit ang pagpatigayon sang “illegal assembly” sa idalom sang revised penal code.
Suno diri dapat magsecure gid sang permit antes ang pagpatigayon sang rally-protest apang kun sa plaza naman, sarang lang ang mga ini nga makaprotesta nga wala sang permit, apang dapat magpahibalo sa ciudad, tatlo ka adlaw antes ang aktibidad.
