Nakagwa na sa presohan ang 80 anyos nga nagluthang-patay sa 36 anyos nga nobyo sang iya bata sa Purok 2, Liptong, banwa sang Valencia, Negros Oriental matapos ang reglementary period.
Sa interview sang Bombo Radyo Bacolod kay Police Lt Stephen Polinar, spokesperson sang Negros Oriental Police Provincial Office, ang insidente nagluntad sang Miyerkules, alas- 12:20 sang kaagahon.
Sa imbestigasyon sang kapulisan, nakita sang amay sa sulod sang ila kwarto nga may duha ka persona nga nagahigda sa katre sang iya 33 anyos nga bata nga babayi.
Nagtindog ang nobyo sang iya bata apang nasal-an sang amay nga kawatan ang biktima kag ini ang iya gilayon nga gintiro.
Nag-agom sang igo sa lawas ang biktima nga gintunaan sang iya kamatayon.
Pahayag ni Polinar, wala napahibalo ang amay nga may gindala nga lalaki ang iya bata sa ila balay kag may yara lamang sila sang isa ka kwarto apang may duha ka katre.
Boluntaryo naman nga nagsungka ang suspek sa kapulisan kag nag-ako sang iya sala apang nakagwa ini sa presohan matapos ang reglementary period sang wala may nagpasaka sang kaso batok sa iya.
