Masobra 500 ka kaso ang gin-nubo sang crime rates nga nagluntad sa Negros Occidental halin Enero tubtob Setyembre subong nga tuig, kun ipaanggid sa kaangay nga period sang 2024.
Sa interview sang Bombo Radyo Bacolod kay Negros Occidental Police Provincial Office spokesperson Police Captain Judesses Catalogo, masobra 500 ang pagnubo sa na-record nga 8-focus crimes subong nga tuig.
Ang 8-focus crimes ang ginalakipan sang murder, homicide, physical injury, rape, robbery, theft, carjacking kag motor napping incidents.
Aminado naman si Catalogo nga hinali nga nagsaka ang shooting cases sang nakaligad nga binulan.
Pahayag sini nga bisan sila ang nakibot bangod sa nakaandan, naganubo ang kaso sang pagpamatay sa ber months bangod masako ang kalabanan sa pagpreparar sa yuletide season.
Apang indi man alarming ang mga insidente sang pagpamatay bangod ang makita nga pagsaka amo ang mga ginaclaim sang Communist People of the Philippines – New People’s Army (CPP-NPA), nga isolated lamang sa pila ka mga lugar.
Dugang pa sini nga kalabanan sa mga kaso sang pagpangluthang ang may nanarisari nga rasun kaangay sang personal grudge.
Pasalig sang NOCPPO nga sila ang padayun nga naga-imbestigar sa mga kaso kag ginatinguhaan nga mapabilin ang seguridad sa bilog nga Negros Occidental.
