Ginalauman sang Provincial Director sang Negros Occidental Police Provincial Office (NOCPPO) nga mafile na ang kaso nga grave threat, illegal discharge of firearms kag violation sa Comelec Gun Ban batok sa lalaki nga nakuhaan sang video nga nanutok kag nagpalupok sang armas-luthang sa Hacienda San Antonio 2 sa Barangay Dos Hermanas, Talisay City.
Sa interview sang Bombo Radyo Bacolod kay NOCPPO Director Police Col. Rainerio de Chavez, matapos makita ang naglapta nga video, gilayon man nila nga ginpahimuan sang tikang kag gintumod ang nagpaniro.
Makita sa video nga gintutok sang lalaki ang armas sa isa ka babayi kag ginpalupok sa duta.
Suno diri, sila ang nagpatawag na sang peace conference sa sa Hacienda San Antonio 2 nga gintambungan man sang Comelec officials.
Pasalig sini nga pasakaan sang kaso nga grave threat, illegal discharge of firearms kag violation sa Comelec Gun Ban ang suspect kag nagalaom si De Chavez nga ini ang mafile na sa Lunes.
Sa karun ginahitso naman ang mga dokumento sa pagpasaka sang kaso.
Apang paathag sini nga sa karun ang ginatutukan sa pagpasaka sang kaso amo ang nakita sa video nga nagpalupok, apang lantawon man nila ang kaupod sini nga security guards.
Ginakasubo sang NOCPPO Director nga wala madakop ang suspect sa ginpatigayon nga hot pursuit operation kahapon.
Panawagan sini sa mga makakita ukon makasugilanon sa suspect nga ipanugyan diri nga magsungka na, bangod sa tion nga mapanaog na ang warrant of arrest, siya ang lagson man gihapon sang kapulisan.
Samtang panugyan sini sa duha ka partido sa Hacienda San Antonio 2 nga estoryahan ang mga problema, kag sila ang mahimo gid magdangop sa Department of Agrarian Reforms, local government units kag iban pa nga ahensya sang gobyerno nga mahimo makabulig sa ila.
Pasalig ni De Chavez nga wala nagapabaya ang NOCPPO sa kaangay nga mga insidente.
