Segi-segi ang back-tracking sang mga kapulisan sa mga suspect nga nagluthang-patay sa dismissed nga pulis sa Purok Michelle, Barangay Dulao, Bago City.
Madumduman nga ginbawian sang kabuhi si Renaldo Bernel, residente sang Barangay Pacol, Bago City, matapos ginpaarakan sang luthang sang ginabanta lima ka persona samtang padulong sa iya ginamanage nga manokan.
Sa interview sang Bombo Radyo Bacolod kay Negros Occidental Police Provincial Office Director Police Col. Rainerio de Chavez, ginpasalig sini nga ‘on top of the situation’ ang Bago City Police Station.
Sa karun, wala pa ang mga ini sang matumod nga persons of interest apang padayun ang backtracking kag sila ang may-ara naman sang nakuha nga mga CCTV footages.
Kalakip sa gina-imbestigaran ang mga Barangay sa Bacolod City nga ginalantaw nangin exit route sang salakyan sang mga suspect.
Paathag sang NOCPPO Director nga sila ang may-ara na sang ginasundan nga lead, apang ini ang indi pa nila mabuyagyag.
Pasalig sini nga indi nila untatan ang imbestigasyon, samtang nagapanawagan man ini sa mahimo nakawitness sa krimen nga magkoordinar agud makabulig sa pagtumod kun ang nacapture nga salakyan sa CCTV amo gid man ang salakyan sang mga suspect.
Sa karun, aminado man si De Chavez nga tuman pa ka damo sang anggulo nga mahimo motibo sa krimen.
Isa diri ang ginaalegar pagpatay sini sa kay Senipr Police Officer 4 Roger Cañete sang Pebrero 2015, apang nadismiss ang kaso matapos magsumiter sang affidavit of no interest ang bata sang nangin biktima.
Si Bernel ang nalakip man sa may red status sa Counter Intelligence Report sang PNP nga gina-alegar protektor sang drug personalities sang aktibo pa nga pulis.
Matapos madismiss sa serbisyo, siya ang nangin security escort man sang pila ka dalagkuan nga negosyante, tubtob nga nangin manager sang manokan.
