Nagmando na ang provincial director sang Negros Occidental Police Provincial Office (NOCPPO) sang maidid nga imbestigasyon sa mga biktima sang shooting incident sa ciudad sang La Carlota kag Talisay sang tinalikdan nga adlaw.
Sa interview sang Bombo Radyo Bacolod kay Police Col. Rainero De Chavez, ang insidente nga natabo sa duha ka persona ang nakumpirmar sang mga ini nga konektado apang ginaimbestigaran pa sang mga ini kun ano ang motibo kasubong man ang person of interests nga may kahimuan sang krimen.
Santo sa inisyal nga imbestigasyon sang mga kapulisan ang mga biktima ang lunsay nga naghalin sa ila nga warehouse nga nahamtang sa Barangay Villamonte, Bacolod City sang Oktubre 2 sakay sa truck nga ginamaneho ni Armando Sepocado, 39 anyos.
Ang kaupod sini nga si Mar Jun Badala, 36 anyos ang nasapwan sa Barangay Zone 15, Talisay City nga may igo sang bala sa ulo kag dughan samtang makaligad ang duha ka oras nasapwan naman ang kaupod sini nga si Sepocado sa sulod sang truck nga may gunshot wounds sa Barangay Haguimit, La Carlota, City.
Suno kay De Chavez, dapat hibaluon sa karun ang motibo sa pagpatay sa duha bangud ang mga ini suno sa witness ang updanay antes pa man nagluntad ang krimen.
Ginaimbestigaran na sang mga ini ang tanan nga posible nga anggulo agud nga masolbar ang kaso kag mahatagan sang hustisya ang kamatayon sang mga biktima.
