Naghatag ang Provincial Director sang Negros Occidental Police Provincial Office (NOCPPO) sang financial assistance sa pamilya nga ginmassacre sa banwa sang Murcia, Negros Occidental.
Madumduman nga ginmassacre ang tatlo ka miyembro sang isa ka pamilya sa Sitio Guinam-an, Barangay Buenavista, Murcia, Negros Occidental sang May 1 sang gab-i.
Ang mga biktima ang ginlakipan sang amay nga si Neldy Celayes, 59 anyos, iloy nga si Josephine Celayes, 60 anyos kag ang ila bata nga si Jovie Celayes, 33 anyos.
Sa interview sang Bombo Radyo Bacolod kay Police Captain Judesses Catalogo, spokesperson sang NOCPPO, personal nga nagpadulong sa Sitio Guinam-an, Barangay Buenavista, Murcia si NOCPPO Director Police Col. Rainerio De Chavez kaupod ang team sang regional investigation and detective management division sang Police Regional Office-Negros Island Region agud nga bisitahon kag nagpatigayon sang ocular inspection.
Suno kay Catalogo personal nga ginbisitahan sang provincial director ang lugar agud nga tsekyaron, sa posibilidad nga may makita pa nga dugang nga ebidensya nga mahimo magamit sa ginapatigayon nga imbestigasyon sa kaso sang pagpatay sa mga biktima.
Nagpadangat sang bulig ang provincial director bangud personal sini nga nakita ang sitwasyon sang nalisdan nga pamilya.
