Suportado sang Negros Occidental Police Provincial Office ang mando ni Philippine National Police (PNP) chief Gen. Nicolas Torre III nga dakpon ang kriminal nga buhi kag ipaidalom sa due process.
Una na nga ginpahayag ni Torre nga ‘ Ang tao na inaresto hindi binaril at pinatay, buhay at andyan ang Human rights’.
Sa interview sang Bombo Radyo Bacolod kay NOCPPO Spokesperson Police Captain Judesses Catalogo, humalin pa sadto may yara na sang internal discipline sa mga kapulisan sa pag-aresto nga kun may yara sang natabo nga pagpang-abuso ini ang ipaidalum sa imbestigasyon.
Suno diri, transparent ang NOCPPO kun may yara sang dakpon kag ginapatuman nga nya yara sa maayo nga estado ang arestado.
Bilang sabat sa panawagan ni chief PNP nga dapat dakpon sang buhi ang suspetsado kag ipaagi sa husto nga proseso, suno kay Catalogo nagakoordinar man sila sa iban nga ahensya kag mas ginapabaskog ang ila trabaho agud mahatag ang husto nga serbisyo sa publiko.
Samtang…pabor ang konsehal kag chairperson sang Committee on Human Rights sa Sangguniang Panlungsod sa ciudad sang Bacolod nga dapat buhi ang gin-aresto kag dapat ipaidalum sa husto nga proseso.
Sa interview sang Bombo Radyo Bacolod kay Councilor Atty. Renecito Novero, kun may yara sang mabaskog nga ebidensya batok sa akusado suhestyon sini nga pasakaan sang nagakaigo nga kaso kag dakpon ang suspetsado.
Suno diri, mabudlay kun ginapahibalo sa publiko ang pangalan sang tawo bangod kun wala man sang mabaskog nga kasiguradohan nga matuod ang ginasugid mabudlay na mabawi ang kahuy-anan sang isa ka tawo.
Pahayag ni Novero, insakto gid man nga dapat buhi ang tawo nga dakpon magluwas na lang kun nagbato ang akusado sa pulis kag nabutang sa delikado ang kaugalingon sini amo na ngamakahimo sang pwersado nga bagay agud maproteksyunan ang kaugalingon sini.
