Masobra sa 400 ka mga pulis ang igadeploy sang Negros Occidental Police Provincial Office (NOCPPO) sa probinsya sang Negros Occidental para sa tigkalalag.
Sa interview sang Bombo Radyo kay Police Captain Wilma Silva, tagpamaba sang NOCPPO, may tagduha ka police personnel nga ihamtang sa mga Police Assistance Desk (PADs) sa kada ciudad kag banwa.
Suno diri, may yara man sang i-assign sa mga seaports, bus terminal kag airport para sa security sang mga nagbyahe.
Nagpaandam man ini nga likawan ang pagdala sang patalum ukon pointed materials, mga baraha, makahulubog nga ilimnon kag mas maayo nga gamay lang nga bag ang bitbiton.
Ang mga kapulisan ang iga-assign humalin sa Oktubre 31 tubtob Nobyembre 3.
Samtang, ginalauman naman sang mga caretaker sang mga patyo ang pagdagsa sang mga tawo.
Sa interview sang Bombo Radyo kay Gregorio Romatico, caretaker sang Burgos Public Cemetery, nagadangat sa P5,000 tubtob P6,000 ang ginasukot sa pagparepair sang pantyon samtang P300 tubtob P500 ang ginasukot sa pagpapinta.
Ginalauman sini ang pagdagsa sang mga tawo sa Oktubre 31 tubtob Nobyembre 1 kag panugyan sini nga magpadulong sang timprano sa patyo agud malikawan ang pagginutok.
