Nagalaom ang tagpamaba sang Negros Occidental Police Provincial Office (NOCPPO) nga madakpan naman ang duha pa ka nabilin nga suspetsado sa pagpatay sa manunudlo sa Binalbagan Catholic College nga si Tony Lazaga kahapon sang kaagahon.
Nahibaluan nga nadakpan na ang isa sa mga suspetsado nga ginkilala nga si Johnrey Castino alyas Jansen, 19 anyos kag residente sa Purok Apitong, Barangay San Teodoro, Binalbagan.
Sa interview sang Bombo Radyo Bacolod kay Police Captain Judesses Catalogo, spokesperson sang NOCPPO, ini matapos nga positibo nga ginkilala sang witness ang suspetsado samtang gintuad naman sini ang duha niya ka kaupdanan samtang nakahunong sa Binalbagan Municipal Police Station.
Sa karun wala pa ginhingadlan ang duha ka nabilin nga suspect, agud indi mahamper ang hot pursuit operation.
Nagalaum si Catalogo nga madakpan na gilayon ang duha ka at large agud mahatag ang nagakaigo nga hustisya sa nalisdan nga pamilya.
Pasalig naman sini nga isolated lamang ang kaso kag ini ang indi man maka-apekto sa status sang banwa sa palaabuton nga Barangay and Sangguniang Kabataan Election.
Aminado man ini nga kun kis-a may nagaluntad nga engkwentro sa tunga sang militar kag New People’s Army (NPA) sa mga nabukid nga bahin sang banwa, apang sa proper kaangay sang ginluntaran sang pagpatay kay Lazaga, makabig paman nga generally peaceful ang sitwasyon.
Apang bangod nagasanyog ang ekonomiya proper sang banwa sang Binalbagan, aminado si Catalogo nga kaupod man sini ang pagsanyog sang krimen nga challenge man sa mga kapulisan.
Nagapakig-unong man ini sa pamilya sang manunudlo, kag nagpasalig nga himuon sang kapulisan ang tanan agud mas mapadasig ang paghatag sang hustisya sa biktima.
Sa pihak nga bahin, ginatugyan na lamang ni Binalbagan Mayor Bebot Mirasol ang pagsolbar sa krimen.
Paathag sang alkalde nga ginahatag na sini sa kamot sang Binalbagan Municipal Police Station ang imbestigasyon sa pagpatay kay Lazaga bangod ini ang makabig naman nga Police matter.
Panindugan naman ni Mirasol nga nagapabilin nga malinong banwa sang Binalbagan.
