Ginatindugan sang Negros Occidental Police Provincial Office ang nauna nila nga statement angot sa ambush sa Sitio Kalanugan, Barangay Minapasuk, Calatrava, kahapon sang aga nga baliskad sa panaysayon sang barangay official nga nainterview sang Bombo Radyo.
Sa interview sang Bombo Radyo kay Barangay Kagawad Jason Balansag, chairman sang committee on peace and order sa Sangguniang Barangay sang Minapasuk, nagpadulong kuntani ang mga pulis sa Sitio Ikugan alas-8:00 sang aga bangud ginpatay sanday Diotay Risutay kag iya hinablos nga si Eliseo Risutay alas-5:00 kaina sang kaagahon.
Sa ila nga pagsaka sa Sitio Ikugan, una ang salakyan sang barangay kun sa diin nagasakay sanday Balansag kag anom ka miyembro sang Barangay Peacekeeping Action Team, nagasunod ang mga staff sang Municipal Disaster Risk Reduction and Management Office kag naulihi ang patrol car sang Calatrava Municipal Police Station nga ginasakyan sang siyam ka mga pulis.
Pag-abot sa Sitio Kalanugan nga ginabanta lima ka kilometros ang kalayuon nagikan sa respondehan nga lugar kun sa diin dakal-dakal na ang dalan, masiot kag wala sang pamalay, nakabati si Balansag sang duha ka dako nga lupok nga ginsundan sang arak-arak nga lupok.
Nagmandu si Balansag sa BPAT members nga maglumpat kag magcover, kag didto na niya nakita nga nagabaslanay sang lupok ang mga pulis kag ang mga rebelde nga nahamtang sa mas mataas nga lugar, samtang may nagatiro man sa team sang barangay kagawad.
Gintinguhaan nanday Balansag nga makapalayo sa lugar kag sang 800 meters tubtub isa na ka kilometro ang ila nga kalayuon nagikan sa ambush site, nag-untat na ang linupok.
Ginhingyo ni Balansag ang mga residente sa lugar nga bisitahan ang ambush site kun may mga armado pa kag sang ila nahibaluan nga wala na, ila ini nga ginpadulungan.
Pag-abot sa ambush site, ila nakit-an nga wala na sang kabuhi si Police Corporal Jayme Nuñez samtang duha naman ang pilason lakip na ang deputy chief of police nga si Police Capt. Jesus Alba kag Police Corporal Dennis Nasis.
Suno kay Balansag, si Nuñez ang may pilas sa liog kag iban nga bahin sang lawas.
Si Alba naman ang napilasan sa tiil samtang ang isa ka pulis ang may pilas sa tiyan kag sa abaga.
Sa interview sang Bombo Radyo Bacolod kay Police Captain nga nagpadulong ang mga miyembro sang Calatrava Municipal Police Station sa Sitio Upper Ikugan, Barangay Minapasuk kahapon sang aga agud nga magserbe sang warrant of arrest kanday Dary Dayawan kag Charry Amacan sa kaso nga murder kag paglapas sa RA 10591 ukon “Comprehensive Firearms and Ammunition Regulation Act” kag indi agud nga magresponde sa nagluntad nga shooting incident sa nasambit nga lugar.
Suno kay Catalogo, ginkuha sang mga kapulisan ang kahigayunan agud nga magserbe sang warrant of arrest kasunod sang intelligence report nga ila nabaton.
Apang, samtang padulong sa Sitio Ikugan ang team sang mga pulis sa dalan pa lang naengkwentro na sang mga ini ang gina-aligar nga katapo sang New People’s Army.
