Nakakinot sang P41 million ang Philippine National Police gikan sa budget nga gintalana sa pagbakal sang body cameras baliskad sa alegasyon ni Senator Manny Pacquiao nga may anomaliya natuhoy sa baklanay sang body camera sa ahensya.
Suno kay Police Lt. Abegael Donasco, deputy spokesperson sang Negros Occidental Police Provincial Office, nagpakita mismo sang computation si PNP Chief Gen. Guillermo Eleazar nga nagapakita kun paano nga nakasave pa sila gikan sa budget para sa procurement sang body camera.
Ang nasave nga P41 million ang plano naman nga gamiton sang PNP sa pagbakal sang adisyunal nga body camera.
Magluwas sa camera, pagagamiton man ini sa improvement sang PNP Command Center.
Aminado naman si Donasco nga kulang gihapon ang budget apang maayo na ini nga magamit gihapon sa kaangay nga purpose.
Nahibaluan nga mga city police station pa lang ang nahatagan sang tag-16 ka mga body cameras sa Negros Occidental, gani nagalaom ini nga mahatagan man sang body cameras ang mga municipal police station.
Makabulig naman ini sa operasyon sang tagsa ka mga municipal kag city police station sa NOCPPO.
Ini naman ini segurado kun makabatun sang body camera ang mga municipal police station bangod aminado man ini nga madamo sang mga probinsya kag Police Stations sa pungsod.
Sa karun, wala paman nakahibalo si Donasco kun san-o maga-umpisa ang pag-implementar sa paggamit sang Body Camera bangod may kadungan ini nga training.
Pasalig naman sini nga seguruhon nila nga magamit sang maayo sang mga kapulisan nga nahatagan sang kahigayunan nga magkapot sang body camera kag tinguhaan sang mga ini nga indi mausik ang ginhatag nga kahigayunan.
