Nagpasalig ang Negros Occidental Provincial Police Office (NOCPPO) nga wala sang problema sa ila ang implementasyon sang Philippine National Police (PNP) National Headquarters may kaangtanan sa gin-issue nga resolusyon sang Korte Suprema nahanungod sa mga guidelines sa paggamit sang body worn cameras.
Suno kay P/Lt. Abegael Donasco, deputy spokesperson sa NOCPPO, nagahulat nalang sila sang mando gikan sa National Headquarters bangod nagpagwa na sang rules ang korte suprema natuhoy sa paggamit sang body camera sang mga law enforcers.
Pasalig naman sini nga wala problema sa NOCPPO ang pagsulundan kag nakahanda sila nga magsunod.
Nagapati naman ini nga sa mas madali nga panahon, ipatuman na ini bangod nagpanaog na sang memorandum ang korte suprema.
Ang body cameras ang pagagamitun sa implementasyon sang search warrants kag warrantless arrest agud nga may mapakita nga ebidensya nga wala sang foul play sa pagpatigayon sang operasyon.
Pinaagi man sini, malikawan ang pagbayolar sang mga kapulisan sa pagsulundan maykaangtanan sa search warrant.
Ginahulat nalang sa karun sang NOCPPO nga mag-umpisa na ang implementasyon sa paggamit kasubong man ang natalana nga training sa mga mahatagan sang prebilihiyo nga magsuksok sini.
Santo sa Rule 113 Section 5 sang Criminal Procedure, ang pag-aresto ang dapat nga recorded pinaagi sa paggamit sang body worn cameras ukon alternative recording device.
Kasubong man santo sa Section 3 Rule 2, ang pagserbe sang warrant of arrest ang dapat nga recorded man gamit ang body worn cameras ukon iban pa nga alternatibo nga recording device.
Suportado naman ini sang mga abogado agud mangin mas mahapos ang pagpamatuod sa operasyon kag makita diri ang matuod nga hitabo.
Samtang ang mga kapulisan nga nagagamit sang body cameras ang nagakinahanglan pa magpangayo sang permiso kun luyag magkuha sang kopya sang footage.
