Naplastar na sang Negros Occidental Police Provincial Office ang deployment sang personnel para sa preparasyon sa eleksyon sa Mayo 12.
Sa interview sang Bombo Radyo Bacolod kay NOCPPO Spokesperson Police Captain Judesses Catalogo, may mga personnel nga magabantay sa election precinct kag may magabantay man sang election paraphernalia.
Sa amat-amat nga pag-abot sang mga election paraphernalias, ang kapulisan ang magahatag man sang security convoy.
Suno diri, ang NOCPPO ang magahatag man sang mga security sa mga banwa kag ciudad ilabi na nga makit-an na ang amat-amat nga pagtuhaw sang mga election related incidents.
May ara man sang isa nga narecord nga ginaverify pa kun makonsiderar nga election related incident, kag gina-evaluate pa ang posibilidad nga magbag-o ang category sang nasambitan nga local government unit.
Apang wala na ginbuyagyag ni Catalogo kun ano ang detalye sang insidente kag kun sa diin natabo.
Pahayag sini nga focus sang NOCPPO nga makahimo sang preventive measures sa mga gina-antisipar nga problema.
Paathag sini nga mas maayo ang preventive actions sangsa magpatigayon sang imbestigasyon kun may matabo na nga insidente.
