Gindumili naman sang Regional Inter-Agency Task Force sang Western Visayas ang non-essential travel halin sa Dumangas, Iloilo padulong sa Negros Island sugod subong nga adlaw, Mayo 25.
Ginkumpirmar sang Philippine Coast Guard (PCG) Station Negros Occidental nga nag-umpisa kaina sang kaagahon ang suspensyon sang byahe halin sa Iloilo province padulong sa Negros Island vice versa.
Suno kay PCG-Negros Occidental Commander Capt. Ludovico Librilla, nabaton na sini ang joint advisory nagikan sa Regional Inter Agency Task Force (RIATF) sa syudad sang Iloilo nga nagpahibalo sa ila nga wala naman ginapahanugutan ang inbound kag outbound sea travel nagikan sa Dumangas port vice versa.
Madumduman nga kadungan sang pagsaka sang quarantine status sang Iloilo City sa modified enhanced community quarantine (MECQ), kalakip man diri ang pagpatuman sang travel moratorium humalin alas-12:01 kainga sang kaagahon tubtob sa Mayo 31 sa byahe sang barko padulong kag pabalik sa Negros Island.
Paathag ni Librilla nga para lang sa mga leisure traveler ukon mga non-essential travel ang pagbawal sa pagsulod sa Iloilo City apang pahanugutan gihapon nga makasulod ang mga essentials kag Authorized Person Outside Residence (APOR).
Pahanumdom naman ni Librilla nga may kinahanglan lang ang mga ini nga icomply nga mga requirements, nga kaangay man gihapon sa nakaligad nga gina-impementar sa ciudad sang Iloilo.
Apang nagapabilin naman nga pahanumdom ni Librilla nga kun wala naman sang importante nga buluhaton, mas maayo nga indi nalang magtabok tubtob sa ma-lift na ang travel moratorium.
Nahibaluan nga ginpahanugutan sa gihapon ang mga essentials goods nga karga sa mga cargoes.
