Suspendido sugod sa Hunyo 4 ang non-essential travel halin sa probinsya sang Iloilo paagi sa Dumangas Port padulong sa isla sang Negros vice versa.
Suno kay Coast Guard Station Negros Occidental commander Captain Ludovico Librilla, nakabaton sila sang advisory nagikan sa gobernador sang probinsya sang Iloilo nga humalin sa Hunyo 4, temporaryo nga suspendihon ang non-essential travel halin sa Dumangas port padulong sa Bacolod City.
Kaina sang aga, nagresume na ang byahe sang fastcraft apang nakanselar pagkaudto bangud ginpaidalom sa Tropical Cyclone Wind Signal Number 1 ang northern Negros Occidental.
Nagpanugyan naman si Librilla sa mga nagabiyahe nga magsunod sang minimum health protocols batok sa COVID-19 bangud sila mismo ang nagapatuman sini sa tion nga magsaka sila kag magtsekyar sang barko.
