Ginkumpirmar sang general manager sang Northern Negros Electric Cooperative Inc. ukon NONECO nga nabalik na ang kuryente sa mga naapektuhan sang brown-out matapos nga maguba ang 12.5MVA Victorias Substations.
Sa interview sang Bombo Radyo Bacolod kay Engr. Wilbe Bilbao, ang brown-out ang nagluntad sang Oktubre 15 alas 5:50 ang takna sang kaagahon kag ang naapektuhan amo ang Victorias, EB Magalona kag portion sang Manapla.
Suno kay Bilbao, nagkaproblema ang transformer gani nagbrown-out.
Wala anay sang NONECO ginpaenergize gilayon ang transformer bangud nagpatigayon pa sila sang series of testing agud nga masiguro ang kondisyon sini.
Apang may yara sila sang nakita nga parameter ang NONECO sa transformer nga wala nakapasar sa testing gani wala na ginpaenergize agud nga malikawan na ang makatuga pa sang dako nga problema.
Gin-athag man sini nga wala naglupok ang transformer kundi wala lamang nakapasar sa test parameters.
Suno kay Bilbao agud nga masolusyunan ang problema kag mabalik na ang kuryente, una nagtawag ini sa NEPC agud magpangayo sang supply sang kuryente bangud may yara na ang NONECO sang Interconnectivity Agreement sa CENECO nga nagjoint venture sa NEPC gani napasigahan na ang apektado sa banwa sang EB Magalona.
Ikaduha nagload transfer ang mga ini sang power sa bahin sang Manapla padulong sa Victorias gani may kuryente na ang mga ini.
Ikatatlo nagmeeting siya sa Victorias Milling Corporation bangud may yara ang NONECO nga embedded nga linya sang kuryente sa nasambit nga kumpaniya kag nagpangayo sang 2.5 megawatts power supply apang ginahulat pa ang approval sang Energy Regulatory Commission (ERC).
Kag ang ikaapat naghulam sila sang transformer sa NOCECO nga nag-abot na kahapon.
Wala man sila nagbakal sang bag-o nga transformer bangud ang daan nga transformer ang indi man guba sang ini ang ginbukad kag may gamay lamang nga kalay-uhon.
Nagpasalig man si Bilbao nga bukas ang opisina sini sa pagbaton sang mga reklamo kag handa ini nga maghimo sang tikang agud ini ang masolusyunan./ Si Bilbao ang tatlo pa lang ka bulan nga nagapungko bilang General Manager sang NONECO.
