Ginahulat pa sang Northern Negros Electric Cooperative (NONECO) ang kompleto nga report gikan sa ila nga Area Manager may kaangtanan sa magtiyo nga nakuryente sa Hacienda Carugiat, Barangay 13, Victorias City sang Huwebes.
Sa interview sang Bombo Radyo Bacolod kay NONECO General Manager Engr. Wilbe Bilbao, sa inisyal nga impormasyon, sila ang may nakit-an nga sinugpunan sa nagaluyloy nga kable sang kuryente.
Madumduman nga napatay ang magtiyo nga sanday Felix Aplasca, 60 anyos kay Dino Aplasca, 19 anyos kag lunsay mga residente sang Hacienda Alicante, Barangay Pasil, E.B. Magalona.
Si Dino ang una nga nakuryente matapos magsab-it sa metal nga karo ang kuryente nga may open wire, samtang nakuryente man ang senior citizen nga tiyo nga nagtuyo nga magbulig sa biktima.
Suno kay Bilbao, sa ila long spanning standard, ang distansya sang kable nga nagakonekta sa poste kag balay ang dapat kutob lamang sa 70 meters.
Apang nagdangat sa masobra 100 meters ang distansya sang poste kag balay sang biktima.
Ginalantaw sini ang posibilidad nga nagsaylo sang balay ang natungdan kag ginsugpunan na lamang ang kable sang kuryente agud makalab-ot.
Paathag man sini nga inisyal pa lamang ang iya nahibaluan kag ginahulat pa sini ang kumpleto nga report sang ila area manager.
Apang pasalig sini nga ano man ang mangin resulta sang imbestigasyon, kag bisan mahibaluan nga may sala gid man ang mga biktima, ang NONECO ang nakahanda gihapon nga magpalab-ot sang bulig.
