BACOLOD CITY — Nakaalerto sa karon ang mga pulis sa bilog nga probinsya sang Negros Occidental kasunod sang intelligence report nga maga-atake ang New People’s Army sa mga police stations.
Suno sa Negros Occidental Police Provincial Office (NOPPO), may yara sang lima ka mga police stations sa palibot sang probinsiya nga target atakehon sang komunista nga grupo nga gindeklarar ni Presidente Rodrigo Duterte nga isa ka terrorist group.
Suno kay NOPPO director Senior Supt. Rodolfo Castil Jr., naglab-ot sa ila nga intelligence monitoring nga target sang NPA ang Cadiz City Police Station kag Hinobaan Municipal Police Station apang ila na nabisto ang mga naga-ispiya sa lugar kag na-istorya nila ang mga ini kag ginpamangkot sang ila mga plano.
Nalakip man ang Bago City Police Station nga suno kay Castil isa sa mga lugar nga wala ginalauman atakehon sang komunista nga grupo.
Madugay naman suno sa NOPPO director nga yara man sa pamahog sang NPA ang Candoni Municipal Police Station kag Himamaylan City Police Station.
Sa karun, yara sa full alert status ang Philippine National Police (PNP) apang suno kay Castil dapat nga yara sa “extra full alert” ang kapulisan sa probinsiya sang Negros Occidental bangud sini.
Ginapreparahan man sang NOPPO ang posible pag sabwag sang kalakasan sang komunista nga grupo sa Disyembre 26 bangud nga magaselebrar ang Communist Party of the Philippines-New People’s Army-National Democratic Front (CPP-NPA-NDF) sang ila nga 49th founding anniversary.
