Nagpasalig ang gobernador sang probinsya Negros Occidental nga preparado ang provincial government kag tagsa ka mga Local Government Units para sa bagyo Tino.
Sa interview sang Bombo Radyo kay Governor Eugenio Jose ‘Bong’ Lacson, napaidalum sa signal no. 2 ang northeastern portion sang probinsya sa bahin sang ciudad sang Escalante kag San Carlos kag banwa sang Toboso, Calatrava, kag Salvador Benedicto samtang signal no. 1 naman sa nabilin nga bahin sang probinsya.
Suno diri, may yara sang opisina subong nga adlaw tubtob bwas sa provincial capitol apang obserbahan pa ang lakat sang bagyo kun bala kinahanglan nga isuspend ang trabaho bwas samtang ang suspension naman sang klase, ginatugyan na sini sa mga LGUs ang desisyon.
Ginalauman nga ilabi nga maigo sang bagyo ang bahin sang 2nd kag 3rd district sa paghulag sang bagyo padulong sa Panay.
Pahayag sang gobernador, iya ginalauman nga indi matam-an ang probinsya sa mangin halit nga dala sang bagyo kag nagpasalig nga preparado ang probinsya kag LGUs para mag-assist sa mga pumuluyo.
Panawagan ni Lacson nga magkalma kag mag-evacuate na kun kinahanglan bangod temporaryo lang man ang bagyo kag ini magalabay lamang.
