Nagpirma na sang kontrata ang Northern Negros H2O Inc. (NNHI) sa Baciwa Primewater sa paghatag sang dugang nga supply sang tubig.
Sa interview sang Bombo Radyo Bacolod kay Mona Dia Jardin, general manager sang Bacolod City Water District, gindihon ang kontrata sa tunga sang nasambit nga bulk water supplier kag Baciwa-Primewater bangud luyag sang mga ini nga mapasanyog ang ila nga serbisyo sa mga konsumidor kag sabat man sa problema sang kakulangan sang supply sa ciudad.
Suno kay Jardin, nagpreparar saang Baciwa-Primewater sa kapin isa ka tuig antes pa man namaterialize ang kontrata.
Gin-abi abi man sini ang nasambit nga development bangud dako gid ini nga bulig ilabi na sa karun ang water district ang problemado sa water supply.
Ginpahayag man sang general manager sang Baciwa nga nagsaylo na ang water district sa ginakuhaan sang supply sang tubig bangud sabaylo nga sa bubon ukon deepwell, nagakuha na ang mga ini sang water supply sa surface water.
Suno diri ang kontrata ang magalawig sang 25 ka tuig kag ang Northern Negros H2O Inc. (NNHI) ang magasupply sang 30-tubtob 50 million nga supply sang tubig kag dako na ini nga bulig sa Baciwa nga igasupply sa ciudad sang Bacolod.
Wala man nag-agi sa bidding ang pagkuha sang water supplier bangud ini ang pribado nga negosasyon sa tunga sang NNHI kag sang Primewater nga partner sang BACIWA sa JVA.
Suno kay Jardin, ang source sang bulkwater supplier ang yara sa Sum-ag river.
Wala naman nakahibalo ang general manager sang Baciwa kun ano ang investment sang NNHI sa Primewater bangud pribado ini nga agreement sang duha ka pribado nga kompaniya apang nagapasalamat ini nga madugangan sang supply sang tubig sa ciudad.
