Priso karun ang isa ka Norwegian sa Bacolod Police Station 4 matapos nga nanglampos sang botelya sa isa ka isa ka ilimnan sa Brgy. Villamonte, Bacolod City.
Ginpriso ang suspetsado nga Harold Harrison Green, 50-anyos, kasado sang Hacienda Elsa, Brgy. Granada apang temporaryo nga nagatiner sa Herrera Apartment sa Helvetia Hights, Brgy. Villamonte matapos nga ginlampusan sang botelya sang ilimnon si Eli Zimmerman, 33-anyos kag residente man sang Brgy. Villamonte samtang yara sila sa Unyots Place sang Agosto 25.
Santo sa pag-usisa sang Police Station 4 sa pagpamuno sang hepe nga si Police Lt. Rondel Tapang, ginpalapitan ni Zimmerman si Green matapos sini nakita nga iya ginasimhutan ang buhok sang 21-anyos nga si Josephine Bayot sang Villa Angela, Phase 2, Bacolod City.
Magluwas diri, nagahambal pa sang binastos si Green.
Apang naakig ini sang ginpalapitan ni Zimmerman gani iya ini ginlampusan sang botelya nga nagresulta sa pagkapilas sini.
Gilayon naman nga gindala sa hospital ang biktima kag ginpriso ang suspetsado.
Subong nga adlaw, hibaluon sang Station 4 sa pamilya ni Zimmerman kun magapasaka pa sila sang kaso batok sa Norwegian.
Samtang nagreklamo man ang tag-iya sang ilimnan nga si Joji Remedios, bangud magluwas nga nanglampos sang botelya si Green, wala pa sini ginbayaran ang iya ginpang-order nga ilimnon kag ginbuka nga mga gamit kaangay sang mga baso kag ashtray.
