Arestado ang notorious nga motornapper, holdupper kag kawatan sa drug buybust operation nga ginpatigayon sa Prk Langis, Brgy Banago, Bacolod City.
Ang subject person ang ginkilala nga si Alyas Part ukon Alyas Moymoy, 27 anyos, residente sa lugar, apang nagaboard man sa Brgy Bata, Bacolod City.
Nadakpan man ang duha pa sini nga kaupdanan nga sanday Alyas Carl, 21 anyos, residente sa Prk Langis, Brgy Banago; kag Alyas Nicole, 28 anyos, lalaki, residente sang Prk Uraro, Brgy 4, Bacolod City.
Sa interview sang Bombo Radyo Bacolod kay Police Captain Rosalino Pugoy Jr., officer in charge sang Bacolod Police Station 3, si Moymoy ang napriso naman sang 2021 bangod man sa Republic Act 9165 ukon Comprehensive Dangerous Drugs Act of 2002.
Suno diri, madamo na sang reklamo tuhoy kay Moymoy partikular na sa Brgy Bata bangod sa ginahimo sini nga motornapping, pagpanghold-up, kag pagpangawat.
Apang ini ang wala ginapasakaan sang kaso, bangod mahimo nagakabawi man sang mga nagreklamo ang mga ginkawat sini.
Ginatumod pa sa karun sang kapulisan kun sanday Carl kag Nicole ang kaupod man sini sa pagpanghold-up, motornapping, kag pagpangawat; apang paathag ni Pugoy nga sila ang palarehas nga nakuhaan sang drug items.
Nakuha sa tatlo ang 10 tanan ka sachet sang suspected shabu kalakip na ang buybust item, nga ginabanta nagabug-at sang 6.1 grams nga may standard drug price nga P41,480.
